رحلتي إلى سريلانكا: بين الطمأنينه والمغامره 🇱🇰
سريلانكا كانت وجهه مختلفه… مميزة بهدوئها، وبساطتها، وبناسها الطيبين.
من اللحظة الأولى، حسيت بشيء مريح في هالبلد… يمكن لأني كنت أسمع الأذان هناك وأحس بروحانيه ما لقيتها بالهند.
🏡 سكني الأول… عند زوجين استثنائيين
سكنت عند زوجين سريلانكيين، كانت الزوجة عالمة بحار متخصصة بأسماك القرش – شيء نادر وغريب بنفس الوقت!
هي وزوجها كانوا راقين في التعامل ومهتمين في النزلاء، وساعدوني في ترتيب خطتي اللي كانت تتغير كل يوم، وفعلاً خلوا الرحله أسهل وأغنى.
⸻
🏙️ يوم في كولمبو
قضيت أول يوم في العاصمة كولمبو:
• شاهدت فيها أطول برج في سريلانكا
• تمشيت في ميدان الاستقلال وتعلمت عن تاريخهم ضد الاستعمار
• دخلت أحد المولات الكبيره، وجربت أكلهم اللي يشبه الأكل الهندي… حار جداً كالعاده 😅
لكن أكثر مكان شدني كان المسجد الأظفر " مسجد الفار"، مبنى أبيض جميل كأنه قطعة من الفن كأنه كعكه مرسومه، وسط مباني عاديه. دخلته وتأملت تصميمه من الداخل والخارج… روعه
⸻
📱 قصة الهاتف والبقاله
وأنا راجع غرفتي، اكتشفت إني نسيت هاتفي!
قمت أركض للبقاله الصغيره اللي مريت عليها، وخايف أكون ناسيه بالتاكسي "التوكتوك". لكن لما وصلت، ابتسمت لي صاحبة البقاله وعطتني الجهاز وكأنها كانت تدري إني برجع له.
حسيت بأمان عجيب… وسألت نفسي: شكثر نحتاج هالنوع من الثقه في عالمنا اليوم؟
⸻
🏞️ صخرة سيجيريا: تحفه فوق القمه
من الأماكن اللي تظل محفوره في الذاكره: صخرة سيجيريا – أو صخرة الأسد
حوالي 1000 عتبه لصعودها… صعود متعب، لكن كل خطوه فيها تستاهل.
وعند بوابة الأسد، المنظر يخليك تنسى كل التعب.
صورت الرحلة كامله، وكانت وحده من أجمل لحظاتي في سريلانكا.
⸻
🌿 الطريق إلى إيلا… والنكهات السريلانكيه
في طريقي إلى إيلا:
• مريت على مزرعة التوابل، وشفت نباتات وخلطات طبيعيه يستخدمونها للصحة والبشرة
• سويت مساج في الهواء الطلق وسط الطبيعه… تجربه ما تنسى
• شريت منهم بعض الكريمات والتوابل العلاجيه وللذكرى
وصلت إيلا بالليل، رغم أن الدرب مرعب شوي مشيت بالظلام لين وصلت السكن، وكان السكن عند زوجين يطبخون للضيوف… وأكلهم؟ لذيذ لدرجه إني نسيت الجوع اللي كان ذابحني.
⸻
🚂 قطار إيلا إلى كاندي… الرحلة السينمائية
ركبت القطار الشهير المفتوح من الجوانب، من إيلا إلى كاندي.
الرحله كأنها مشهد من فيلم… مناظر خضراء، شلالات، جبال وسحب، والهواء عجيب طول الطريق.
ما تحس بالوقت، وكل لحظه فيها متعه.
⸻
💎 كاندي… الأحجار الكريمه وتاريخ العرب
في كاندي:
• زرت متحف الأحجار الكريمه، وتعلمت شلون كانوا العرب يزورون سريلانكا ويشترون منها الأحجار من قرون.
• عرفت إن سريلانكا كان اسمها قديماً “سرنديب”، وهي من أقدم محطات التجاره البحريه، يزورها تجار العرب والفرس والهنود.
⸻
🐘 زيارة لمحمية الفيله… والمطر يتدخل
خططت لزيارة محمية الفيله، لكن للأسف المطر كان غزير وما قدرت أستمتع بالمكان مثل ما كنت أتمنى.
ومع ذلك، استمتعت بالجو العام، والناس، والهدوء.
⸻
☕️ زيارة مصنع الشاي .. شي عجيب
كوني من محبين الشاي بشكل عام .. قلت لازم أزور مصنع الشاي السيريلانكي
ووصلت هناك واستمتعت بتفاصيل عميلة آلية المصنع.
🌺 ثقافة سريلانكا: لمحات تستحق الوقوف
• اللغه الرسميه: السنهاليه والتاميليه، لكن كثير منهم يتكلم إنجليزي ممتاز، وبعضهم حتى يعرف عربي بسيط.
• الديانات: بوذيه بالدرجة الأولى، لكن المسلمين والهندوس والمسيحيين موجودين، والاحترام متبادل.
• الأكل: حار جدا مثل الهند، لكن يعتمد على جوز الهند والتوابل الفريده.
• العادات: ودودين، نظيفين، ومحترمين جداً في التعامل. نادر تلقى أحد يرفع صوته أو يزعجك.
• الأمان: عالي جداً، والناس فعلاً أمناء بشكل يطمن.
⸻
سريلانكا بلد يخلط بين الهدوء والمغامره، بين الأخلاق العاليه والطبيعه الساحره.
وفيها روح نادره… ما تحس فيها إلا لما تعيشها.
هل أرجع لها؟ أكيد.
وفي المره القادمه، راح أكتشف جنوبها وجزرها… ، ومادري يمكن أقعد فيها زياده.
ليست هناك تعليقات:
إرسال تعليق